E Enjte, 08 Qershor 2023

Sesionet e trajnimit mbi orientimin në tregun e punës po zhvillohen gjatë muajve maj-qershor me studentët e universiteteve publike dhe private në Tiranë, Durrës, Vlorë, Shkodër, Elbasan, Korçë dhe Gjirokastër. Deri në 70 studentë dhe të rinj të sapodalë në tregun e punës do të mentorohen në muajt në vijim nga alumnët e Akademisë së Studimeve Politike, profesionistë të profileve të ndryshme në administratë, biznes dhe shoqërinë civile në qytete të ndryshme të vendit.

Nëpërmjet këtyre sesioneve informuese dhe trajnuese synohet që rreth 225 studentë të rrisin kapacitetet e tyre për të shkruar një letër motivi, prezantuar si duhet eksperiencën e tyre në një CV, rritur përgatitjen e tyre për një intervistë pune si dhe krijuar një orientim për karrierën e tyre të lidhur me edukimin dhe talentin e tyre.

Të gjithë studentët e përfshirë në këto trajnime janë të ftuar që të aplikojnë dhe bëhen pjesë e grupit që do të mentorohen më tej për të nisur një punë në qytetet e tyre në administratë, biznes, organizata të shoqërisë civile dhe kudo tjetër. Duke orientuar nisjen e një karriere profesionale si dhe falë mentorimit, synohet që të krijohet mjedisi i duhur që të rinjtë të ndërtojnë karrierën e tyre në vendlindje pas përfundimit të studimeve.   

Projekti “Së bashku për të zhvilluar karrierën në Shqipëri” zbatohet nga Akademia e Studimeve Politike me mbështetjen financiare të Agjencisë Kombëtare të Rinisë dhe Ministrit të Shtetit për Rininë dhe Fëmijët në kuadër të Thirrjes së dytë të projekteve për Rininë.
 
Kërkoni mentorin në qytetin tuaj duke shprehur interesin dhe dërguar një CV në adresën info@asp.al deri në 16 tetor 2023
 
Më shumë informacion mbi projektin mund të konsultoni këtu

 
Mund të shkarkoni udhëzuesin për orientimin e karrierës këtu