E Enjte, 21 Shtator 2023

Deputetët e Grupit të Gjelbër pranë Kuvendit të Shqipërisë iu bashkuan aktiviteteve ndërgjegjësuese të Javës Europiane të Mobilitetit, eventit kryesor promovues të Bashkimit European për nxitjen e lëvizjes së qëndrueshme urbane. Si një veprim konkret në këtë drejtim, parlamentarëve dhe stafit të Kuvendit iu mundësuan për transportin e tyre tre skutera elektrikë, si një mjet që redukton ndotjen dhe lehtëson trafikun.

Aksioni ka për qëllim promovimin prej parlamentarëve të formave alternative dhe të zgjuara të transportit si dhe ndërgjegjësimin e deputetëve për përmirësimin e legjislacionit dhe ofrimin e stimujve për zhvillimin e transportit urban miqësor me natyrën.
Në ceremoninë e prezantimit të kësaj inisitiave, z.Arben Pëllumbi, kryetar i Grupit të Gjelbër, vendosi theksin në nevojën e rregullimit ligjor të përdorimit të skuterave elektrikë në vendin tonë, në mënyrë që këto mjete që ndihmojnë në reduktimin e gjurmës së karbonit të mos kthehen në problematike për këmbësorët dhe përdoruesit e tjerë të rrugës.

Skuterat elektrikë u mundësuan si pjesë e programit “Zhvillimi i kapaciteteve të grupeve joformale parlamentare të gjelbra nga Evropa Juglindore për qëllimet e energjisë dhe transportit në përputhje me BE-në”, i mbështetur nga Qeveria Federale Gjermane nëpërmjet Fondeve Rajonale të Hapura për Evropën Juglindore – Energji, Transport dhe Mbrojtje të Klimës, të bashkëfinancuara nga Bashkimi Evropian dhe nën zbatimin e Deutsche Gesellschaft für Internationale Zusammenarbeit (GIZ) GmbH në bashkëpunim me Akademinë e Studimeve Politike (ASP).

Ceremonia ishte gjithashtu pjesë e aktivitetit informues me nxënës të Shkollës së Kuqe në Tiranë, të organizuar nga Kuvendi i Shqipërisë, përmes programeve të edukimit qytetar. Diskutimi mes deputetëve dhe nxënësve u fokusua në pasojat e aktivitetit njerëzor në ndryshimet klimaterike. Deputetët shpjeguan për pjesëmarrësit të gjitha iniciativat ligjore të ndërmarra nga Kuvendi i Shqipërisë me fokus mbrojtjen e mjedisit.   

Ekspertja e ftuar, znj. Ariela Hajdarmataj, prezantoi për nxënësit konceptet kryesore të Mobilitetit Urban si dhe gjetjet dhe rekomandimet që po ofrohen për transportin publik në qytetetin e Tiranës si pjesë e projektit të Transportit Urban të Qëndrueshëm (SUTi) të GIZ.

Në fund të takimit përfaqësuesit e qytetarëve në Parlament i këshilluan nxënësit të jenë aktiv në mbrojtjen e mjedisit, duke nisur me veprime të vogla në nivel komunitar, pranë shkollës, banesës e kështu me radhë, për të shmangur pasojat e parikuperueshme në mjedis dhe shëndetin tonë.