E Enjte, 05 Shkurt 2015

Akademia e Studimeve Politike (ASP) shpërndau sot në një ceremoni zyrtare certifikatat e përfundimit të vitit akademik 2014 për pjesemarrësit e programit të saj "Shkolla Shqiptare e Studimeve Politike". Të 20 studentët u diplomuan pas përfundimit me sukses të një periudhe një vjeçare studimi. Në praninë e shefit të Këshillit të Europës Z. Marco Leidekker dhe ambasadorit të Zvicrës Z. Christof Graf, stafi i ASP akordoi diplomat për gjeneratën e tetë të pjesëmarrësve të programit që synon të mbledhë bashkë për t'u trajnuar në fushën e lidershipit dhe demokracisë, udhëheqës nga forca të ndryshme politike, administrata publike dhe vendore, shoqëria civile dhe mediat.
Z. Leidekker u shpreh në fjalën e tij: "Ne e mbështesim këtë kurs jo vetëm për formimin tuaj personal, por njëherazi për Shqipërinë dhe të ardhmen e qytetarëve të saj. Ne besojmë se ju, secili prej jush, mund të luajë një rol në sigurimin e të ardhmes evropiane të Shqipërisë. Sepse, privilegjet, vijnë bashkë me përgjegjësinë".
Ambasadori i Zvicrës Z. Graf u shpreh: "Prioritet e qeverisë zvicerane në ndihmën në Shqipëri janë decentralizimi dhe demokratizimi i qeverisjes vendore. Shkolla juaj është një terren i mirë për të mbështetur këto fusha. Ju inkurajoj që të jeni ambiciozë dhe të angazhuar edhe në të ardhmen. Përdoreni mundësinë për të kontribuar në ndryshimin pozitiv të vendit tuaj dhe integrimin evropian të tij".
“Dëshiroj të shfrytëzoj edhe njëherë rastin për të shprehur falenderimin për Këshillin e Evropës dhe Zyrën e Bashkëpunimit Zviceran në Shqipëri. Ju siguroj, se investimi tek dijet dhe zgjerimi i botëkuptimeve të gjeneratës së të rinjve, është ndihma më e mirë për të ardhmen e vendit tonë dhe vetë botës që duam të ndërtojmë", tha në fjalën e tij Drejtori i Akademisë së Studimeve Politike, Z. Erjon Tase.
Pas fjalimeve pjesëmarrësit dëgjuan gjithashtu dy dëshmi nga studentët e diplomuar. Ngjarja u mbyll me dhënien e diplomave dhe me një pritje.